චීනයේ මාරාන්තික නව කොරෝනා වසංගතය නිසා වූහාන් නගරයෙහි දැනට කොටු වී සිටින ශ්‍රී ලාංකික සිසුන් අතරින් ඇතැම් පිරිසකට, තමන් රැස් කර තබා ගත් ආහාර සංචිත අවසන් වෙමින් පවතින හෙයින් එම ආහාර ද්‍රව්‍ය සහ අවශ්‍ය විටමින් වර්ග ඔවුන් වෙත අඛණ්ඩව සැපයීම සඳහා ශ්‍රී ලංකා රජය පියවර ගනිමින් සිටින බව ජනාධිපති විදේශ කටයුතු අතිරේක ලේකම් අද්මිරාල් ජයනාත් කොළඹගේ පැවසුවා.
වූහාන් හි ඔවුන් ඉගෙනුම ලබන විශ්ව විද්‍යාල සහ ඔවුන් නවාතැන් ගෙන සිටින නේවාසිකාගාර වලින් එම සිසුන්ට පිසූ ආහාර ලබා දෙන බවත් එහෙත් එම සිසුන් මෙම ආහාර මගින් මෙම රෝගය තමන් වෙත ද වැළඳීම සිදු විය හැකි යැයි සිතා ආහාර ලබා ගැනීමට අකමැත්තක් දක්වන බවද ලේකම්වරයා පැවසුවා.
මෙම සිසුන්ට අවශ්‍ය ආහාර, විටමින් ලබා දීම පිළිබඳව මෙන්ම මෙම සිසුන් පිරිස කඩිනමින් ශ්‍රී ලංකාව වෙත ගෙන්වා ගැනීම සඳහා චීන රජය මෙන්ම හූබෙයි ප්‍රාන්ත රාජ්‍ය බලධාරීන් සමග ද ශ්‍රී ලංකා රජය සහ චීනයේ ශ්‍රී ලංකා තානාපති කාර්යාලය ද නිරන්තරයෙන් සාකච්ඡා පවත්වමින් සිටින බවත් අද්මිරාල් ජයනාත් කොළඹගේ වැඩිදුරටත් සඳහන් කරනවා.
මේ අතර ඊයේ (29) දින රාත්‍රී 6.10 ට කුංමිං සිට එම්.යූ.- 713 දරන ගුවන් යානය සහ රාත්‍රී 6.28 ට ෂැංහයි සිට එම්.යූ.- 231 දරන චයිනා ඊස්ටන් ගුවන් සේවයේ ගුවන් යානා දෙකක් පැමිණ තිබෙනවා.
ඊට අමතරව එදිනම රාත්‍රී 9.10 ට චොංකිං සිට චොංකිං ගුවන් සේවයේ ඕ.කිව්.- 2393 දරන ගුවන් යානය ද කටුනායක ගුවන් තොටුපළ වෙත පැමිණ තිබූ අතර එම ගුවන් යානාවල ශ්‍රී ලාංකික සිසුන් 30 දෙනෙකු පැමිණ තිබෙනවා.
ඊට අමතරව අද (30) දින අලුයම චීනයේ සිට පැමිණි ශ්‍රී ලන්කන් ගුවන් යානා තුනකින් ද තවත් ශ්‍රී ලාංකික සිසුන් 110 ක් කටුනායක ගුවන් තොටුපළ වෙත පැමිණ තිබුණා.
ඔවුන් අද දින අලුයම 5.10 ට ෂැංහයි සිට පැමිණි යූ.එල්.- 867 දරන ගුවන් යානයෙන් ද , අලුයම 5.50 ට බෙයිජිං සිට පැමිණි යූ.එල්.- 869 දරන ගුවන් යානයෙන් ද , ග්වැන්ෂෝ සිට අලුයම 6.10 ට පැමිණි යූ.එල්.- 885 දරන ගුවන් යානයෙන් ද කටුනායක ගුවන් තොටුපළ වෙත පැමිණ තිබුණා.
ඒ අනුව චීනයේ සිට ශ්‍රී ලාංකික සිසුන් 140ක් කටුනායක ගුවන් තොටුපළ වෙත පැමිණ තිබූ අතර ඔවුන් සියලු දෙනා ඔවුන්ගේ නිවෙස් වෙත යැවීමට පියවර ගෙන තිබුණා.
එහෙත් ඔවුන්ට මෙම වෛරස් රෝගී ලක්ෂණ පහළ වුවහොත් වහාම ළඟම ඇති රෝහල වෙත ගොස් අවශ්‍ය වෛද්‍ය ප්‍රතිකාර ලබා ගන්නා ලෙසද ඔවුන්ට ගුවන් තොටුපළ සෞඛ්‍ය වෛද්‍ය ඒකකයේ වෛද්‍යවරුන් උපදෙස් දී තිබුණා.
(Neth)