කාන්තා ඔබේ දෑත් නිර්මාණශීලී ය. ඒ නිර්මාණශීලීත්වය ඔප් නංවන්නට අපි ද ඔබට රිබන් එම්බ්‍රොයිඩරි නිර්මාණයක් මෙලෙස ගෙන එන්නෙමු. වරලස මලින් සරසන ලද මේ අපූරු යුවතිය බිත්ති සැරසිල්ලක් හැඩකරන්න.
කුෂන් කවරයට පමණක් නොව ඔබේ හිත මිතුරකු වෙනුවෙන් තිළිණ කරන්න වගේම ඔබේ විසිත්ත කාමරය හැඩ කරන්නත් අපූරුයි. රිබන් එම්බ්‍රොයිඩරි කලාවෙන් මේ අත්කම ඉතා පහසුවෙන් ඔබටත් දැන් නිර්මාණය කරගත හැකියි.
අවශ්‍ය ද්‍රව්‍ය
කළු, නිල්, සුදු, රෝස, ක්‍රීම්, රතු පැහැ ෆැබ්රික් වර්ණ
නො. 0, 01, 02, 03 ෆ්ලැට් පින්සල්
ලිනන් රෙදි
ටේලරින් කාබන්
වෙළෙඳපොළෙන් මිල දී ගත් කෘත්‍රිම කොණ්ඩ ( විග්)
නො. 18 - 22 ට්‍රැපැස්ට්‍රි ඉඳිකටු
එම්බ්‍රොයිඩරි කතුරක්
එම්බ්‍රොයිඩරි රාමුවක්
මැජෙන්ටා, රෝස, සුදු, ඔලිව් ග්‍රීන් සහ ඩාර්ක් ග්‍රීන් බේබි රිබන්
නිර්මාණය කරගන්නා ආකාරය
පළමුව සෝදා මැදගත් ලිනන් රෙද්ද මත ටේලරින් කාබන් තබා රූපයේ ඇති යුවතියගේ මුහුණ පිටපත් කරගන්න. ඉන්පසු යුවතියගේ මුහුණ සඳහා ක්‍රීම් සහ සුදු වර්ණ මිශ්‍රකරමින් වර්ණ ගන්වා අවශ්‍ය තැන් සඳහා රෝස මිශ්‍ර කරගන්න.
දැන් රූපයේ දක්වා ඇති පරිදි යුවතියගේ ඇස් සහ තොල් ද වර්ණ ගන්වා හොඳින් වියළා ගන්න. ඉන්පසු හෙයා විග් එක ගෙන රූපයේ පරිදි අවශ්‍ය තැන් වලට හිසකෙස් තබා ස්වභාවිකත්වයක් ලැබෙන ආකාරයට සකසා නූල් භාවිත කර රෙද්දට සවිවන සේ මසා ගන්න.
දැන් යුවතියගේ හිස සරසන මල් මසා ගත යුතුයි. ඒ සඳහා මැජන්ටා වර්ණයෙන් ස්ට්‍රෙච් ස්ටිච් දෙකක් දමමින් පෙති මැසීම ආරම්භ කරන්න. ඉන්පසු ලා රෝස පාටින් පෙති දෙකකුත්, සුදු පාටින් පෙති දෙකකුත් ලෙස මල මසා ගන්න. ඒ ආකාරයට මල මසාගත් පසු තැඹිලි හෝ ගෝල්ඩන් යෙලෝ කපු කැරලි නූල්වලින් ලූප් ෆ්‍රෙන්ච් නොට්ස් 2 -3ක් දමමින් මලේ රේණු මසා ගන්න. ඉන්පසු ඔලිව් ග්‍රීන් සහ ඩාර්ක් ග්‍රීන් රිබන් භාවිත කරමින් ස්ට්‍රෙච් ස්ටිච් ක්‍රමය භාවිතයෙන් කොළ මසා ගන්න. අවසානයේ සමනලුන් මැසීම සඳහා සුදු රිබන් භාවිතකර එක් පැත්තකට ලූප් ස්ටිච් 2ක් මසා ගන්න. අනෙක් පසට ද එලෙසම ලූප් ස්ටිච් 2ක් මසා පිහාටු ලෙස 3D ආකාරයට ලූප්ස් ලිහිල්ව මසා ගන්න. ඉන්පසු සමනලයාගේ ඉතිරි කොටස් ටික රූපයේ ආකාරයට කළු නූලෙන් මසා අවසන් කරන්න.
උපදෙස්
ප්‍රවීණ මැහුම් උපදේශිකා හා මෝස්තර නිර්මාණ ශිල්පිනී
යමුනා විජේමාන්න
Tharunie