ගොඩ දෙනෙක් මාළු ඇඹුල් තියල් ගැන දැන සිටියත් කුකුළු මස් අැඹුල් තියල් ගැන එතරම් දැනුවත් නැහැ. කුකුළු මස් අැඹුල් තියල්... මාළු අඹුල් තියල් තරම්ම රසවත්. මෙන්න මේ විදිහට හදලා බලමු.

මේ සඳහා කපාගත් කුකුළු මස් කිලෝ 1ක්, මිරිස් කුඩු තේ හැඳි 1 1/2ක්, විනාකිරි මේස හැඳි 2ක්, ගොරකා ග්‍රෑම් 200ක්, ගම්මිරිස් කුඩු මේස හැඳි 5ක්, ලුණු, අමු මිරිස් කරල් 4-5ක්, බැදපු තුනපහ කුඩු මේස හැඳි 3ක්, රම්පේ හා කරපිංචා සහ කුරුඳු පොතු කෑල්ලක් අවශ්‍යයි.

කුකුළු මස් හොඳට සෝදලා වතුර බේරෙන්න තියන්න. වතුර බේරුණාම මිරිස් කුඩු සහ විනාකිරි එක්ක ලුණු ටිකක් දාලා හොඳට කලවම් කරගෙන පැයක් මැරිනේට් කරගන්න. මැරිනේට් කරගත්ත කුකුළු මස් ටික ගැඹුරු තෙලේ බැදගන්න. 

ගොරකා තම්බලා අමු මිරිස්, ගම්මිරිස් කුඩු  තුනපහ කුඩු, රම්පේ, කරපිංචා, කුරුඳු පොතු, ලුණු එක්ක අඹරාගන්න. 

බැදගත් කුකුළු මස්වලට ගොරකා පේස්ට් එක දාලා වතුර චුට්ටක් දාලා හොඳට කලවම්කර ගන්න. මැටි හට්ටියක අතුරාගෙන පියනකින් වසා අඩු ගින්දරේ පිසගන්න.

සැරින් සැරේ අඩිය අල්ලන්න නොදී කලවම්කර ගන්න. ඉස්ම හොඳටම හිඳුණම පියන ඇරලා නිවෙන්න තියන්න.

Tharunie