ශ්රී ලංකා රේගු දෙපාර්තමේන්තුවේ පුරප්පාඩු පිරවීම සඳහා නව නිලධාරීන් බඳවා ගැනීමේදී කිසිදු බලපෑමක් සිදු නොකරන බව මුදල් රාජ්ය ඇමැති, ආචාර්ය රංජිත් සියඹලාපිටිය මහතා ප්රකාශ කළේය.
මේ පිළිබඳව වැඩිදුරටත් අදහස් දැක්වූ රාජ්ය ඇමැතිවරයා මෙලෙස ද කීවේය.
“රේගුවේ කටයුතු වඩාත් කාර්යක්ෂම කිරීමේ අරමුණෙන් දැනට පුරප්පාඩුව පවතින සහකාර රේගු අධිකාරී සහ රේගු පරීක්ෂක තනතුරු සඳහා බඳවා ගැනීමේ ක්රියාවලිය මේ දිනවල සිදු වෙමින් පවතිනවා. එම බඳවා ගැනීමේ කටයුතුවලට කිසිදු ආකාරයේ බලපෑමක් සිදු වන්නේ නෑ. යම් අයකු එසේ බලපෑම් කර රේගුවට පැමිණීමට උත්සාහ කරන්නේ නම් එය සිදු වන්නේ නෑ.
ඒ අනුව ඉහත තනතුරු සඳහා බඳවා ගැනීමේ සම්මුඛ පරීක්ෂණ සඳහා විභාග දෙපාර්තමේන්තුවෙන් පැවැත්වූ විභාගය සමත් ඉහළම ලකුණු ගත් අයගේ නාම ලේඛනය ලකුණු අනුපිළිවෙළ අනුව නොව ආකාරාදී පිළිවෙළ අනුව රේගුවට පළමුව යොමු කරනවා.
මේ රටට වැඩිම ආදායම් සොයන ආයතනයට ඇතුළත් වීමට රටේ උගත් තරුණ දූ පුතුන්ට අවස්ථාව සලසාදී තිබෙනවා. විනිවිදභාවයෙන් යුත් ආදර්ශවත් බඳවා ගැනීමක් සිදු කරන නිසා මීට අදාළ ගැසට් පත්රයේ සඳහන් ආකාරයට පිටින් කිසිවක් සිදු නොවන බව මම වගකීමෙන් ප්රකාශ කරනවා.”