කොළඹ ජාතික රෝහලේ නියෝජ්‍ය අධ්යක්ෂ වෛද්‍ය රුක්ෂාන් බෙල්ලන මහතා පැය 7කට ආසන්න කාලයක් ඔහුගේ නිල කාර්යාලයේ සිර කර තබාගැනීමට සුළු සේවකයන් ඊයේ (16) කටයුතු කළ අතර, පොලිසිය සහ කැරලි මර්දන ඒකකය එක් වී මහත් පරිශ්‍රමයක් දරා ඔහු රෝහල් පරිශ්‍රයෙන් පිටතට ගෙන යෑමට කටයුතු කළේය.
වෛද්‍ය රුක්ෂාන් බෙල්ලන මහතා විසින් සුළු සේවකයන් ඉලක්ක කරගෙන විටින් විට කරන ලද ප්‍රකාශවලට විරෝධය පළ කරමින් සුව සේවකයෝ මෙසේ ඔහු කාර්යාල අඩස්සියේ රඳවාගෙන රෝහල් භූමියේ කලහකාරිව හැසිරුණහ. මේ හේතුවෙන් රෝහල් පරිශ්‍රය තුළ දැඩි නොසන්සුන්කාරි තත්ත්වයක් මතු වූ අතර, තත්ත්වය පාලනය කිරීමට කැරලි මර්දන ඒකකයද කැඳවීමට සිදු විය. සුළු සේවකයන් විරෝධය දක්වමින් කලහකාරිව හැසිරෙන අතරතුර කැරලි මර්දන ඒකකයේ සහ පොලිසියේ සහාය ඇතිව බෙල්ලන මහතා සිය කාර්යාල කාමරයෙන් එළියට රැගෙන විත් පොලිස් ජීප් රථයක නංවා රෝහල් පරිශ්‍රයෙන් රැගෙන යෑමට පොලිසිය පියවර ගත්තේය.
ඊයේ (16) දහවල් 12.00ත් 12.30ත් මේ විරෝධය ආරම්භ කළ අතර, සවස 6.30ට පමණ ඒ මහතා පරිශ්‍රයෙන් එළියට ගැනිණි. රෝහල් සේවකයෝ විශාල පිරිසක් රෝහල් භූමියට රැස්ව කලහකාරිව හැසිරෙමින් බෙල්ලන මහතා එම තනතුරෙන් ඉවත් කරන ලෙස ඉල්ලමින් දිගින් දිගටම විරෝධතාව දැක්වූහ.
වෛද්‍යවරුන්ට දෙන රු. 35,000ක වැට් දීමනාව ඉල්ලමින් සෞඛ්‍ය වෘත්තීය සමිති 72ක් පසුගිය 13 දා සිට දින 2ක කාලයක් වැඩවර්ජනයක් ක්‍රියාත්මක කළ අතර, ඒ අවස්ථාවේදී මාධ්‍යයට අදහස් පළ කරමින් වෛද්‍ය රුක්ෂාන් බෙල්ලන සුළු සේවකයන් පහත් කර කතා කළ බවට සේවකයෝ මෙහිදී චෝදනා කළහ. මේ අතර වෛද්‍ය රුක්ෂාන් බෙල්ලන මහතාගේ නිවෙස අවට ආරක්ෂාවට පොලිසිය යොදවා ඇති බවද වාර්තා විය.
Dinamina