අවශ්‍ය වන්නේ
සුදු කැකුළු හාල් කෝප්ප 3ක්
උකු පොල්කිරි අවශ්‍ය ප්‍රමාණයට
ලුණු පදමට
සිහින්ව ගා ගත් පොල් කෝප්පයක්
සිහින්ව ගා ගත් කිතුල් හකුරු කෝප්පයක්
තළාගත් කරදමුංගු හා කරාබු නැටි 3ක්
හදන්නෙ මෙහෙමයි
මුලින්ම අපි පැණි පොල් මිශ්‍රණය සාදා නිවෙන්න තියා කිරිබත් එක හදමු.භාජනයකට කිතුල් හකුරු ටික හා වතුර මේස හැන්දක් දමා ළිපේ තියා මඳ ගින්දරේ හැඳි ගාමින් උණු කරන්න.
හකුරු මිශ්‍රණය උණු වෙනකොට එයට පොල් හා තළාගත් කරදමුංගු හා කරාබු නැටි දමා නොනවත්වාම හැඳි ගාන්න. පැණි පොල් මැළවී හොඳ සුවඳක් එනවා. එවිට ළිප නිවන්න.
දැන් සුදු කැකුළු හාල් හොඳින් සෝදා අපි සාමාන්‍ය කිරිබත් උයන ප්‍රමාණයට වතුර දමා ළිප තියන්න. බත ඉදී වතුර හිඳෙනකොට පොල්කිරි හා පදමට ලුණු දමා කිරි ටික හිඳෙන තුරු හැන්දෙන් කලවම් කරමින් උයාගන්න.
උයාගත් කිරිබත ටිකක් නිවෙන්න තියන්න. මඳක් නිවුණු කිරිබත් ටිකක් පුවක් කොළපතකට හෝ ලන්ච් ෂීට් එකක් මැදට තියා රොටියක් වගේ තුනීකර මැදට පැණි පොල් ටිකක් තියන්න. දැන් පැණි පොල් පැත්ත අනිත් පැත්තෙන් වසා මදක් තදකර දෙපැත්තට අඹරා ගන්න (ටොෆියක දෙපැත්ත වගේ). දැන් එය සෙමෙන් දිග හැර කෙසෙල් කොළයක අතුරා මේසයට තියන්න.
(Tharunie)