අනාගත සමාජ අභියෝගවලට මුහුණ දීම සඳහා සුවිශේෂී නායකත්ව ගුණාංගයන්ගෙන් යුත් ජවසම්පන්න, දැනුමෙන් සන්නද්ධ, විනයගරුක පුරවැසියන් බවට තරුණ ප්‍රජාව හැඩගැන්වීම අරමුණු කර ගත් ශ්‍රී ලාංකේය තරුණ විරුවන් ඇගයීම සඳහා වන ‘ජාතික තරුණ විරු සම්මානය’ හඳුන්වා දීමේ ක්‍රියාන්විතය ජාතික ශිෂ්‍යභට බලකාය හරහා සිදුකරන බව වැඩබලන ආරක්‍ෂක අමාත්‍ය ප්‍රමිත බණ්ඩාර තෙන්නකෝන් මහතා පැවසීය.
රන්ටැඹේ ජාතික ශිෂ්‍යභට බලකා පුහුණු මධ්‍යස්ථානයේ දී ඊයේ (01) පැවති ජාතික ශිෂ්‍යභට බලකායේ 41 ක් වන පරිවාස නිලධාරී කණ්ඩායමේ විසිරයාමේ පෙළපාලියේ ප්‍රධාන ආරාධිත අමුත්තා ලෙස සහභාගි වෙමින් අමාත්‍ය තෙන්නකෝන් මෙම අදහස් පළ කරන ලදි.
ශ්‍රී ලංකාවේ සියලුම පළාත් නියෝජනය වන පරිදි 2022 වසරේදී බඳවා ගන්නා ලද කාන්තා නිලධාරිනියන් 10 දෙනෙකු ඇතුළුව පරිවාස නිලධාරීන් 64 දෙනෙකු සාර්ථක පුහුණුවක් නිම කිරීමෙන් අනතුරුව ඊයේ දින දෙවන ලුතිනන් නිලයේ අධිකාරිය ලබා මෙලෙස විසිර ගියහ.
වසර 142 ක ජාතික ශිෂ්‍යභට බලකා ඉතිහාසයේ ප්‍රථම වතාවට විසිර යාමේ පෙළපාලියකදී සිදුකරන ලද, ශ්‍රී ලංකා ප්‍රජාතාන්ත්‍රික සමාජවාදී ජනරජයේ අතිගරු ජනාධිපතිතුමන් විසින් සන්නද්ධ සේවා නිලධාරීන් ලෙස අධිකාරී ලබන නිලයන් වෙත සංකේතාත්මකව ප්‍රදානය කරනු ලබන අසිපත්, ජාතික ශිෂ්‍යභට බලකා පරිවාස නිලධාරීන් වෙත ප්‍රදානය කිරීම ද මෙවර පෙළපාලියේ දී අමාත්‍යවරයා අතින් සිදුවිය.