ප්‍රජාතන්ත්‍රවාදී ගුණාංග තවදුරටත් වර්ධනය කරගැනීම සඳහා පාර්ලිමේන්තුව වෙත සිය සහය ලබාදෙන බව පොදුරාජ්‍ය මණ්ඩලීය පාර්ලිමේන්තු සංගමයේ නියෝජිතන් කථානායක වෛද්‍ය ජගත් වික්‍රමරත්න සහ ප්‍රධාන නිලධාරීන් හමුවෙමින් පවසයි.
ව්‍යවස්ථාදායක නිර්දේශිත නිර්ණායක සපුරාගැනීම පිණිස පොදුරාජ්‍ය මණ්ඩලීය පාර්ලිමේන්තු සංගමයේ සහාය ඇතිව ශ්‍රී ලංකා පාර්ලිමේන්තුව ස්වයං තක්සේරු අභ්‍යාසයක නිරත වේ.
පොදුරාජ්‍ය මණ්ඩලීය පාර්ලිමේන්තු සංගමයේ, යහපාලන ව්‍යාපෘතියේ වැඩසටහන් කළමනාකරු ෆ්‍රේසර් මැකින්ටොෂ් (Fraser McIntosh) මහතා සහ සීෂෙල්ස් රාජ්‍යයේ, ජාතික සභාවේ නියෝජ්‍ය මහලේකම් ඇලෙක්සැන්ඩ්‍රියා ෆවුරේ (Alexandria Faure) මහත්මිය පසුගියදා (24) පාර්ලිමේන්තුවේදී ගරු කථානායක වෛද්‍ය ජගත් වික්‍රමරත්න හමුවිය. ඒ ප්‍රජාතන්ත්‍රවාදී ව්‍යවස්ථාදායකයන් සඳහා පොදුරාජ්‍ය මණ්ඩලීය පාර්ලිමේන්තු සංගමයේ නිර්දේශිත නිර්ණායක මත පදනම්ව, 2025 මාර්තු 24 සිට මාර්තු 28 දක්වා ශ්‍රී ලංකා පාර්ලිමේන්තුව විසින් පවත්වන ලද ස්වයං තක්සේරු අභ්‍යාසයට සහාය වීම සඳහා මෙරටට පැමිණ සිටි පොදුරාජ්‍ය මණ්ඩලීය පාර්ලිමේන්තු සංගමයේ නිලධාරීන්ගේ ශ්‍රී ලංකා සංචාරය අතරතුර ය.
මෙහිදී පොදුරාජ්‍ය මණ්ඩලීය පාර්ලිමේන්තු සංගමය විසින් සමාලෝචනය කර ඉදිරිපත්කර ඇති ප්‍රජාතන්ත්‍රවාදී නීති සම්පාදන සඳහා නිර්දේශිත නිර්ණායක වල වැදගත්කම පිළිබඳව එම නියෝජිත පිරිස කථානායකවරයා දැනුවත් කළහ.
පාර්ලිමේන්තුවක් ස්ථාපිත කළ යුතු ආකාරය සහ එය ක්‍රියාත්මක විය යුතු ආකාරය පිළිබඳ අවම ප්‍රමිතියක් සහ මාර්ගෝපදේශයක් මෙම නිර්දේශිත නිර්ණායක මගින් සපයන බවත් ඒවා පාර්ලිමේන්තු තුළ ප්‍රයෝගිකව ක්‍රියාත්මක කිරීම ඔස්සේ වඩාත් ප්‍රජාතන්ත්‍රවාදී නීති සම්පාදන ක්‍රියාවලික් කරා යොමු වීමට පවතින හැකියවන් පිළිබඳව ඔවුන් මෙහිදී කරුණු දැක්වූහ. ඒ අනුව ප්‍රජාතන්ත්‍රවාදී නීති සම්ප්‍රදායන් සඳහා නිර්දේශිත නිර්ණායක පිළිබඳව පාර්ලිමේන්තුවක් ලෙස ස්වයං තක්සේරුකරණයක් සිදුකිරීමේ වැදගත්කම ද එම නියෝජිත පිරිස මෙහිදී අවධාරණය කළහ.
වෙස්මිනිස්ටර් පාර්ලිමේන්තු සම්ප්‍රදාය තුළ බ්‍රිතාන්‍ය පාර්ලිමේන්තුවේ පවතින සම්මුතීන් පිළිබඳව ශ්‍රී ලංකා පාර්ලිමේන්තුව වඩාත් සැලකිලිමත්ව කටයුතු කරන බව මෙහිදී අදහස් දක්වමින් කථානායකවරයා පැවසුවේය. එමෙන්ම වර්තමානය වනවිට ප්‍රජාතන්ත්‍රවාදී ව්‍යවස්ථාදායකයන් සඳහා වූ නිර්දේශිත නිර්ණායක ඔස්සේ යමින් ශ්‍රී ලංකා පාර්ලිමේන්තුව කටයුතු කරමින් සිටින බවද කථානායකවරයා මෙහිදී සඳහන් කළේය. ඒ අනුව මේ වනවිට කාරක සභා, ආබාධ සහිත වූවන් සඳහා වන පාර්ලිමේන්තු සංසදය ඇතුළු සංසද, පාර්ලිමේන්තු මිත්‍රත්ව සංගම් ස්ථාපිත කර ඇති බව පෙන්වා දුන් කථානායකවරයා ඒ ඔස්සේ ගරු පාර්ලිමේන්තු මන්ත්‍රීවරුන් වැඩි පිරිසකට ව්‍යවස්ථාදායක කටයුතු සඳහා මැදිහත්වීමට අවස්ථාව ලැබී ඇති බවද පෙන්වා දුන්නේය.
පොදුරාජ්‍ය මණ්ඩලීය පාර්ලිමේන්තු සංගමයේ නිලධාරීන් පාර්ලිමේන්තුවේ නියෝජ්‍ය කථානායක වෛද්‍ය රිස්වි සාලි මහතා සහ නියෝජ්‍ය කාරක සභා සභාපති හේමාලී වීරසේකර මහත්මියද හමුවිය. මෙහිදී අදහස් දැක්වූ නියෝජ්‍ය කථානායකවරයා සඳහන් කළේ වර්තමානය වන විට වඩා යහපත් ප්‍රජාතන්ත්‍රවාදී පාර්ලිමේන්තු සංස්කෘතියක් නිර්මාණය වෙමින් පවතින බවත් ඒ තුළ සෑම මන්ත්‍රීවරයෙකුටම පක්ෂ විපක්ෂ භේදයකින් තොරව සභාගර්භය තුළ අවස්ථාවන් හිමිවන බවයි. නියෝජ්‍ය කාරක සභා සභාපති හේමාලි වීරසේකර මහත්මිය සඳහන් කළේ පාර්ලිමේන්තුව තුළ කාන්තා නියෝජනය වැඩිවීම මගින් මෙරට කාන්තාවන් සහ දරුවන් වෙනුවෙන් කළයුතු කාර්යයන් වඩාත් පහසු වනු ඇති බවයි.
තවද මෙම නියෝජිත පිරිස පාර්ලිමේන්තුවේ සභානායක, අමත්‍ය බිමල් රත්නායක මහතා හමුවූ අතර එහිදී එම නියෝජිත පිරිස වර්තමානය වනවිට ශ්‍රී ලංකා පාර්ලිමේන්තුව, ප්‍රජාතන්ත්‍රවාදී ව්‍යවස්ථාදායකයන් සඳහා වූ නිර්දේශිත නිර්ණායක වඩාත් හොඳින් සපුරලින් පසුවන බවත් තවදුරටත් වර්ධනය කරගැනීම සඳහා අවශ්‍ය තාක්ෂණික සහය ලබාදීමට සුදානම් බවත් පැවසුහ. මෙහිදී අදහස් දැක්වූ සභානායකවරයා, ප්‍රජාතන්ත්‍රවාදී පාර්ලිමේන්තු සංස්කෘතියක් ගොඩ නැගීමේදී පාර්ලිමේන්තු කාර්ය මණ්ඩලයේ කාර්යභාරයේ වැදගත්කම අවධාරණය කළේය. ඒ අනුව ඔවුන්ගේ රාජකාරි කටයුතු තවදුරටත් ඵලදායි ලෙස ලබාගැනීම සඳහා අවශ්‍ය වැඩමුළු, පාර්ලිමේතුව විදෙස් පුහුණු වැඩසටහන්, දැනුම හුවමාරු කිරීමේ වැඩසටහන් කරා යොමු කරවීම සහ ඔවුන්ගේ රාජකාරි කටයුතු සිදුකිරීම සඳහා අවශ්‍ය අනෙකුත් පහසුකම් ලබාදීමේ අවශ්‍යතාවයද නියෝජිත පිරිසට අවධාරණය කළේය. එමෙන්ම ශ්‍රී ලංකා පාර්ලිමේන්තුව මගින් ලබන වසරේදී පාර්ලිමේන්තු ඇකඩමියක් ස්ථාපිත කිරීම සඳහා සැළසුමක් ද පවතින බව සභානායකවරයා වැඩි දුරටත් අදහස් දක්වමින් පැවසුවේය. ඒ අනුව මේ කටයුතු සඳහා අවශ්‍ය සහාය ලබාදීමට පොදුරාජ්‍ය මණ්ඩලීය පාර්ලිමේන්තු සංගමය සුදානම් බව එම නියෝජිතයින් පැවසුහ.
නියෝජිත පිරිස පාර්ලිමේන්තුවේ මහ ලේකම් කුෂානි රෝහණදීර, කාර්ය මණ්ඩල ප්‍රධානී සහ නියෝජ්‍ය මහ ලේකම් චමින්ද කුලරත්න සහ සහකාර මහ ලේකම් හංස අබේරත්න යන මහත්ම මහත්මීන්ද හමුවූහ. මෙහිදී මහලේකම්වරිය විසින් පාර්ලිමේන්තුවේ වර්තමාන ක්‍රියාවලිය පිළිබඳව මෙන්ම තවදුරටත් වර්ධනය කරගතයුතු දේ පිළිබඳව නියෝජිත පිරිසට අවබෝධයක් ලබා දෙන ලදී. එමෙන්ම දැනට සභා ගර්භයේ රැස්වීම කටයුතු පමණක් සංඥා භාෂා පරිවර්තනයකට යොමු කරන බවත් ඉදිරියේදී කෝප් ,කෝපා යනාදී කාරක සභා වල කටයුතු ද සංඥා භාෂා පරිවර්තන සමගින් විකාශය කිරීමට සැලසුම් කර ඇති බව මහලේක්ම්වරිය වැඩිදුරටත් අදහස් දක්වමින් පැවසුවාය.
මේ අතර ෆ්‍රේසර් මැකින්ටොෂ් (Fraser McIntosh ) මහතා සහ ඇලෙක්සැන්ඩ්‍රියා ෆවුරේ (Alexandria Faure) මහත්මිය ගරු අධිකරණ හා ජාතික ඒකාබද්ධතා අමාත්‍ය හර්ෂණ නානායක්කකාර,පාර්ලිමේන්තු මන්ත්‍රිවරියන්ගේ සංසදය, පාර්ලිමේන්තුවේ සියළු දෙපාර්තමේන්තු ප්‍රධානීන් සහ කාර්යමණ්ඩලය සමග ද සාකච්ඡා පැවැත්වූහ.
මේ අතර පොදුරාජ්‍ය මණ්ඩලීය පාර්ලිමේන්තු සංගමයේ නියෝජිත පිරිස පාර්ලිමේන්තුව විසින් පවත්වන ලද ස්වයං තක්සේරු අභ්‍යාසය පිළිබඳව ලබාගත් නිරීක්ෂණ හා අත්දැකීම් වැඩසටහනෙන් අවසන් දිනය වූ 2025.03.28 වනදා පාර්ලිමේන්තු මහලේකම් කුෂානි රෝහණදීර මහත්මිය වෙත ඉදිරිපත් කළේය.මේ අවස්ථාවට කාර්ය මණ්ඩල ප්‍රධානී සහ නියෝජ්‍ය මහ ලේකම් චමින්ද කුලරත්න සහ සහකාර මහ ලේකම් හංස අබේරත්න යන මහත්වරුන්ද එක්ව සිටියහ. එහිදී අදහස් දක්වමින් එම නියෝජිත පිරිස, ලංකා පාර්ලිමේන්තුව විසින් පවත්වන ලද මෙම ශ්‍රී ස්වයං තක්සේරු අභ්‍යාසය පිළිබඳ වාර්තාව ඉදිරියේදී සකස් කර ඉදිරිපත් කරන බවත් ජාතන්ත්‍රවාදී ව්‍යවස්ථාදායකයක් සඳහා අවශ්‍ය සහය අඛණ්ඩව ලබාදීමට සුදානම් බවත් ඔවුහු පැවසුහ.