දසවැනි පාර්ලිමේන්තුවේ පළමුවැනි සභාවාරයේ 2025 ජනවාරි මස 24 වැනි සිකුරාදා දින පැවති ප්‍රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්‍යාංශයීය උපදේශක කාරක සභා රැස්වීමේදී ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක මහතා විසින් අනුකාරක සභා ත්‍රිත්වයක් පිහිටුවීමට කටයුතු කර තිබේ.
ප්‍රථම අනුකාරක සභාව අවිධිමත් ප්‍රවාහන කර්මාන්තය හා සම්බන්ධ වෘත්තිකයින්ගේ වෘත්තිය සුරක්ෂිතතාව තහවුරු කිරීම වෙනුවෙන් පිහිටුවා ඇති අතර මෙම වෘත්තිකයන් වෙනුවෙන් වෘත්තිමය වශයෙන් පිළිගැනීමක් ඇති කිරීම අරමුණු කොට තිබේ. ඒ අනුව මෙහිදී පුද්ගලික බස් රථ රියදුරන්, කොන්දොස්තරවරුන්, ත්‍රීරෝද රථ රියදුරන් සහ ඉලෙක්ට්‍රොනික යෙදවුම් හරහා ප්‍රවාහන ක්ෂේත්‍රය තුළ නියැලී සිටින්නන් (App Base Workers) වෙනුවෙන් සේවක අර්ථසාධක අරමුදලේ (EPF) සහ සේවා නියුක්තයන්ගේ භාර අරමුදලේ (ETF) දායකත්වය ලබා දීම ඇතුළු කරුණු කිහිපයක් පිළිබඳ පරීක්ෂා කෙරේ.
මෙම අනු කාරක සභාවේ සාමාජික මන්ත්‍රීවරු ලෙස චන්දන සූරියආරච්චි (සභාපති), ජගත් විතාන, දිනිඳු සමන් සහ දේවානන්ද සුරවීර යන මහත්වරු පත්කොට තිබේ.
දෙවැනි අනුකාරක සභාව ප්‍රවාහන ක්ෂේත්‍රය හා සම්බන්ධ නීතීමය රාමුව ශක්තිමත් කිරීම තුළින් සාධනීය දිශානතියක් කරා ප්‍රවාහන ක්ෂේත්‍රය යොමු කරවීම වෙනුවෙන් පිහිටුවා ඇති අතර මේ මගින් ප්‍රවාහන ක්ෂේත්‍රය හා සම්බන්ධ නීතීමය රාමුව ශක්තිමත් කිරීම, ඉදිරි වසර පහකින් පසුව ශ්‍රී ලංකාවේ ප්‍රවාහන ක්ෂේත්‍රයේ දිශානතිය කෙබඳු ද යන්න තීරණය කිරීම, ප්‍රවාහන මාධ්‍යයන් භාවිත කිරීමේදී කාන්තාවන් සහ ආබාධිත ප්‍රජාව මුහුණ දෙන ගැටලු කෙරෙහි විශේෂ අවධානය යොමු කිරීම සහ ප්‍රවාහන ක්ෂේත්‍රය දියුණු කිරීම සඳහා නෛතික සහ පරිපාලනමය යෝජනා ඉදිරිපත් කිරීම අරමුණු කොට තිබේ.
මෙම අනු කාරක සභාවේ සාමාජික මන්ත්‍රීවරු ලෙස නීතිඥ ලක්මාලි හේමචන්ද්‍ර (සභාපති), සුගත් වසන්ත ද සිල්වා, තනුර දිසානායක සහ සුජීව දිසානායක යන මහත්ම මහත්මීන් පත්කොට තිබේ.
තෙවැනි අනුකාරක සභාව ප්‍රවාහන කර්මාන්තය හා බැඳි අතිරේක සේවා නිර්මාණය කිරීම සඳහා ව්‍යාපෘති මාදිලි (Business Models) සැකසීම වෙනුවෙන් පිහිටුවා ඇති අතර මේ මගින් පවතින සම්පත් භාවිත කොට ප්‍රවාහන ක්ෂේත්‍රයෙහි මූලික අභිප්‍රායන් හා බැඳී පවතින අංශ දියුණු කිරීම සහ අතිරේක සේවා නිර්මාණය කොට එමගින් අමතර ආදායම් උත්පාදනය කිරීම සඳහා ව්‍යාපෘති මාදිලි (Business Models) සැකසීම අරමුණු කොට තිබේ.
මෙම අනු කාරක සභාවේ සාමාජික මන්ත්‍රීවරු ලෙස චතුරංග අබේසිංහ (සභාපති), රවීන්ද්‍ර බණ්ඩාර සහ ධනුෂ්ක රංගනාත් යන මහත්වරු පත්කොට තිබේ.