දූත මණ්ඩලයේ ආර්ථික රාජ්‍යතාන්ත්‍රික වැඩසටහනේ කොටසක් ලෙස, කෙන්යාවේ සිටින ශ්‍රී ලංකාවට විදේශ විනිමය ඉපැයීම් සඳහා දායක වෙමින් ආයෝජන මඟින් මුදල් උපයා දෙන ශ්‍රී ලාංකික ආයෝජකයින් සමඟ සම්බන්ධ වීම සඳහා, කෙන්යාවේ ශ්‍රී ලංකා මහකොමසාරිස් වේලුපිල්ලේ කනනාදන් මැතිතුමා 2021 අගෝස්තු 31 දින නයිරෝබි හි හෙළ ක්ලෝතින් ඇඟළුම් කර්මාන්ත ශාලාවට ගියේය.
මෙම ස්ථානයේ දී මහ කොමසාරිස්වරයා සාදරයෙන් පිළිගත් හෙළ ක්ලෝතින් ඇඟළුම් සමාගමේ කළමනාකාර අධ්‍යක්ෂ දිලංක ජිනදාස මහතා, නිෂ්පාදන ඒකක වටා කැඳවාගෙන යමින් කෙන්යාවේ ඔවුන්ගේ ආයෝජනවල පැතිකඩ සහ ක්‍රියාකාරිත්වය පිළිබඳව එතුමාට විස්තර කළේය. කෙන්යාවේ හෙළ ක්ලෝතින් ඇඟළුම් මඟින් වාර්ෂිකව ඩොලර් මිලියන 130 ක ආදායමක් ලංකාවට ලබා දෙයි. තම සමාගම මෝස්තර නිර්මාණයේ සිට බෙදා හැරීම දක්වා ගෝලීය වෙළඳ නාම සමඟ සමීපව කටයුතු කරන බවත්, හරිත මූලාරම්භයන්, නවෝත්පාදන ව්‍යාපාරික විසඳුම් සහ සදාචාරාත්මක හා තිරසාර සේවා පරිසරයන් හේතුවෙන් අප්‍රිකාවේ නමක් දිනාගෙන සිටින බව කළමනාකාර අධ්‍යක්‍ෂවරයා පැවසීය. මෙරටට විදේශ විනිමය ආදායමක් උත්පාදනය කරන බාහිර ආයෝජන සඳහා, ශ්‍රී ලංකාව විසින් ද සහයෝගය දැක්විය යුතු බව කළමනාකාර අධ්‍යක්‍ෂවරයා සඳහන් කළේය. කෙන්යාවේ දී ක්‍රියාත්මක වෙමින් පවතින ව්‍යාපාරික කටයුතු පුළුල් වීමත් සමඟම නැවත ශ්‍රී ලංකාව වෙත එවනු ලබන ආදායම ද ඉහළ යන බව ඔහු පැවසීය. තවද, කෙන්යාවේ සිටින ශ්‍රී ලාංකික ආයෝජකයින් සඳහා මහ කොමසාරිස් කනනාදන් මැතිතුමා දක්වන සහයෝගය සහ මඟ පෙන්වීම කළමනාකාර අධ්‍යක්‍ෂවරයා අගය කළේය. ශ්‍රී ලංකාවේ විදේශ විනිමය ඉපැයීම් සඳහා විදේශීය ආයෝජන විශාල වශයෙන් තිරසාර ලෙස දායක වන බව පිළිගත් මහ කොමසාරිස්වරයා, මේ පිළිබඳ සෑම අංශයකටම පහසුකම් සැලසීම සඳහා එතුමා ශ්‍රී ලංකාවේ සහ කෙන්යාවේ බලධාරීන් සමඟ කටයුතු කරන බවට පොරොන්දු විය.
හෙළ ක්ලෝතින් ඇඟළුම් සමාගම යනු ශ්‍රී ලාංකිකයෙකුට අයත්, ශ්‍රී ලංකාව, ඉතියෝපියාව, ඊජිප්තුව සහ කෙන්යාව පුරා පිහිටි කර්මාන්තශාලා සහිත සදාචාරාත්මක හා තිරසාර ඇඟලුම් නිෂ්පාදන ආයතනයකි. 2016 සිට කෙන්යාවේ ඇඟලුම් නිෂ්පාදනයේ පුරෝගාමියෙකු වන හෙළ ක්ලෝතින් සමාගම, කෙන්යාවේ මුළු ඇඟලුම් අපනයනයෙන් 15% ක් හිමි කෙන්යාවේ විශාලතම යට ඇඳුම් නිෂ්පාදකයා දක්වා වේගයෙන් දියුණව කරා ගොස් තිබේ. නයිරෝබි හි හෙළ ක්ලෝතින් ඇඟළුම් නිෂ්පාදන ඒකක දෙකක් පිහිටුවා ඇති අතර, ඉන් එකක් මඟින් යට ඇඳුම් සහ අනෙක මගින් පුද්ගලික ආරක්‍ෂක උපකරණ (PPE) හා මුහුණු ආවරණ නිෂ්පාදනය කරයි. තවද කෙන්යාවේ සිදුකළ හෙළ ආයෝජන මඟින් ශ්‍රී ලාංකිකයින් 64 දෙනෙකුට සහ කෙන්යාවේ වැසියන් 4,600 කට රැකියා ලබා දී ඇත. එය කෙන්යාවේ රෙදි නිෂ්පාදන ඒකකයක් පිහිටුවීමේ ක්‍රියාවලියක ද යෙදී සිටී.
ශ්‍රී ලංකා මහකොමසාරිස් කාර්යාලය
නයිරෝබි
2021 සැප්තැම්බර් 01 වැනි දින
(LNW)