මෙරට ඩිජිටල් තාක්ෂණ හා ආයෝජන ක්ෂේත්‍රයේ සන්ධිස්ථානයක් සලකුණු කරමින් තාක්ෂණ අමාත්‍යාංශයේ සංවිධායකත්වයෙන් පසුගිය 25 වැනිදා සිට 27 වැනිදා දක්වා පැවැත්වෙන DigiEcon Global Investment සමුළුවට එක්වන “සිංගප්පූරු මූල්‍ය අධිකාරියේ (MAS) මූල්‍ය තාක්ෂණ අංශ (FINTECH) ප්‍රධානී සොප්නෙන්දු මොහන්දි මහතා ප්‍රමුඛ නියෝජිත පිරිස සහ ශ්‍රී ලංකා මහකොමසාරිස් සෙනරත් දිසානායක මහතා අතර හමුවක් පසුගියදා (21) පැවැත්විණි.
එහිදී මේ සංචාරයේ ඇති වැදගත්කම අවධාරණය කරමින් අදහස් දැක්වූ මහකොමසාරිස්වරයා පැවසුවේ DigiEcon Global Investment -2024 සමුළුවත් සමඟ ක්ෂේත්‍රයේ නව අවස්ථා සොයා යෑමත් තාක්ෂණ ප්‍රගතියත් උදෙසා වන ශ්‍රී ලංකාවේ මාර්ග සිතියම දිග හැරෙන බවත්, අදාළ සෑම ක්ෂේත්‍රයක්ම නියෝජනය වන පරිදි සාධාරණීයව ශ්‍රී ලංකාව මේ වෙනුවෙන් කැපවනු ඇති බවත්ය.
මොහන්දි මහතාගේ නායකත්වයෙන් යුතු මේ නියෝජිත පිරිසට සිංගප්පූරු මූල්‍ය අධිකාරියේ (MAS)නියෝජ්‍ය අධ්‍යක්ෂ අල්වින්දර් සිං, Law Asia නිර්මාතෘ සහ MAS යටතේ ස්ථාපිත ආණ්ඩු ප්‍රධානීන්, ව්‍යාපාරික ප්‍රජාව, බුද්ධිමතුන් සහ සිවිල් සමාජය සමඟ සම්බන්ධ වෙමින් තාක්ෂණික නවෝත්පාදනය හා එම යෙදවුම් මූල්‍ය තාක්ෂණ ක්ෂේත්‍රයට අදාළ කරගැනීම පිළිබඳ කටයුතු කරන ලාභ නොලබන ආයතනයක් වන Elevandi මණ්ඩලයේ ජ්‍යෙෂ්ඨ උපදේශක ඩාටෝ පෝල් සුප්‍රමනියම් ,නැන්යැංග් තාක්ෂණ විශ්වවිද්‍යාලයේ, ජනාධිපති කාර්යාලයට අනුබද්ධ ගෝලීය අලෙවිකරණ හා උපායමාර්ග පිළිබඳ ඒකකයේ අධ්‍යක්ෂිකා, Elevandi උපදේශිකා ප්‍රීති දව්රා යන මහත්ම මහත්මීහු අයත් වෙති. මේ සමුළුවේදී තාක්ෂණ රාජ්‍ය ඇමැති කනක හේරත් මහතාගේ ආරාධනය පරිදි “ඩිජිටල් තාක්ෂණ පරිවර්තනය වේගවත් කරන්නා වූ නව ආයෝජන ආදර්ශ “ තේමාවෙන් යුතු සංවාද මණ්ඩපයට මොහන්දි මහතා එක්වනු ඇත.
මොහන්දි මහතා ප්‍රමුඛ FINTECH නියෝජිත පිරිස ජනාධිපති රනිල් වික්‍රමසිංහ මහතා හමුවීමට ද නියමිතය. එම හමුවේදී ඩිජිටල් පොදු යටිතල පහසුකම්, කුඩා හා මධ්‍ය පරිමාණ ව්‍යවසාය ක්ෂේත්‍රයේ ගෝලීය සම්බන්ධතා සහ ධරණීය මූල්‍ය පාලනය වැනි කාරණා සාකච්ඡාවට ලක්වනු ඇත.
සිංගප්පූරු නියෝජිත පිරිසගේ මේ සංචාරයේ ප්‍රමුඛ අරමුණු වන්නේ ඩිජිටල් ආර්ථික ක්ෂේත්‍රයේදී ශ්‍රී ලංකා රජය සහ උසස් අධ්‍යාපන ආයතන සමඟ සහයෝගයෙන් කටයුතු කරමින් ඩිජිටල් ආර්ථිකයක් තුළ මූල්‍ය තාක්ෂණය වර්ධනය කරන අතර ඩිජිටල් සාක්ෂරතාව සහ ඩිජිටල් තාක්ෂණික සවිබලගැන්වීමට ඇති හැකියාව සොයා බැලීමයි.
එසේම ශ්‍රී ලාංකික ශිෂ්‍යයන් වෙත ඩිජිටල් මූල්‍ය තාක්ෂණ ක්ෂේත්‍රයේ පශ්චාත් උපාධි අධ්‍යාපන (MA,PhD) ශිෂ්‍යත්ව වැඩසටහනක් සඳහා ඩිජිටල් මූල්‍ය පිළිබඳ ආසියානු ආයතනයේ (Asian Institute of Digital Finance) සහ සිංගප්පූරුවේ නැන්යැංග් තාක්ෂණික විශ්වවිද්‍යාලයේ ( NanyangTechnology University ) අවස්ථාව දීමට ඇති හැකියාව පිළිබඳ විශ්වවිද්‍යාල ප්‍රතිපාදන කොමිෂන් සභාවේ සභාපති සහ විශ්වවිද්‍යාල බලධාරීන් සමඟ සාකච්ඡා කිරීමට ද නියමිතය.
මේ හමුවට සිංගප්පූරු මූල්‍ය අධිකාරියේ නියෝජ්‍ය අධ්‍යක්ෂ අල්වින්දර් සිං සහ Elevandi මණ්ඩලයේ ජ්‍යෙෂ්ඨ උපදේශක ඩාටෝ පෝල් සුප්‍රමනියම්, මහ කොමසාරිස් කාර්යාලයේ ඇමැති (වාණිජ) යසන්ත යද්දෙහි මහත්වරු එක් වූහ.