බත්ගස නමින්ද විරුදාවලිය ලත් කොස් ගස පුරාවටම ඖෂධීය ගුණ රැසක් ඇති බව අප සැවොම දන්නා කරුණක්.
මේ ගසේ ගෙඩි කුඩා කාලයේදී අප පොලොස් ලෙස ආහාරයට ගන්නවා වගේම එය හොඳින් පැසුණු පසු විවිධ ක්‍රමවලට සාදා ආහාරයට ගැනීම සිදුකරනු ලබයි. අප අද මේ ගෙන එන්නේ කොස් ඇටවලින් සාදන ලද රසවත් කළුපොල් මාළුවක් ඔබට ඉදිරිපත් කරන්නයි. මේ දිනවල කොස්ගස යට වැටුණු කොස් ඇට ඕනෙ තරම් ඇති. වියදමක් නැතුවම හොයාගන්න පුළුවන් කොස් ඇට ටිකෙන් හදන කළුපොල් මාළුවක රස බලන්නකෝ.
අවශ්‍ය ද්‍රව්‍ය
හොඳින් තම්බාගත් කොස් ඇට
ග්‍රෑම් 500 ක්
මිරිස් කුඩු තේ හැඳි 2ක්
තුනපහ කුඩු තේ හැන්දක්
කපාගත් ලොකු ලූනු ගෙඩියක්
කරපිංචා කොළ ඉත්තක්
රස අනුව ලුණු
දියකිරි කෝප්ප 2 ක්
මිටිකිරි කෝප්පයක්
බැද ගැනීම සඳහා
ගාගත් පොල් ටිකක්
සූදුරු, කොත්තමල්ලි
කුරුඳු කැබැල්ලක්
කෑලි මිරිස් තේ හැඳි 2ක්
කැකුළු හාල් මේස හැදි 2ක්
සාදන ක්‍රමය
තම්බාගත් කොස් ඇට ටික තලාගන්න. ඉන්පසු එයට මිරිස් කුඩු, තුනපහ කුඩු, ලූනු, ලූණූ කරපිංචා එකතුකරන්න. දියකිරිද මෙයට එක්කර ළිපේ තබා මදගින්දරේ පිස ගන්න. කිරි හිදීගෙන එන විට ඉහතින් බැද හොඳින් අඹරාගත් කුඩු ටික මිටිකිරි කෝප්පයට දමා කලවම් කර එයද කොස් ඇට මිශ්‍රණයට දමා නටවා ළිපෙන් බා ගන්න.
(Tharunie)