නිල් චිත්රපට නිළියක වන ස්ටෝමි ඩැනියෙල්ස් සමඟ ලිංගික සම්බන්ධතාවක් පැවැත්වීමෙන් පසු එය රහසක් ලෙස තබා ගැනීම වෙනුවෙන් ඇයට අමෙරිකානු ඩොලර් එක්ලක්ෂ තිස්දහසක මුදල් ගෙවීමක් සිදු කිරීම සහ එය සැඟවීමට සිය ව්යාපාරික ගිණුම ව්යාජ ලෙස සකස් කිරීමේ චෝදනාව සම්බන්ධව අමෙරිකාවේ හිටපු ජනාධිපති ඩොනල්ඩ් ට්රම්ප් වරදකරු බව ඊයේ නිව්යෝක් නුවර අධිකරණය තීන්දු කළ බව විදෙස් මාධ්ය වාර්තා කළේය.
අමෙරිකාවේ ජනාධිපතිවරයකුට එරෙහිව නඩු විභාගයක් පවත්වා වරදකරු කළ පළමු අවස්ථාව ලෙස එය ඉතිහාසයට එක් වූ බවද විදෙස් මාධ්ය වැඩිදුරටත් වාර්තා කළේය. වසර 2016 ජනාධිපතිවරණය ආසන්නව තිබියදී එය සිදුවී ඇති අතර, හිටපු ජනාධිපතිවරයාට එරෙහිව ගොනු කර තිබූ චෝදනා 34කට ඔහු වරදකරු බව අධිකරණය ප්රකාශ කර ඇතැයි ද වාර්තා වේ.
ඊයේ නඩු විභාගයෙන් පසු නිව්යෝක් අධිකරණයෙන් පිටතට පැමිණි ඩොනල්ඩ් ට්රම්ප් ප්රකාශ කර ඇත්තේ එය අවමානයක් බවය. ඔහුගේ රිපබ්ලිකන් පක්ෂයේ සෙසු නියෝජිතයන්ගේ ද සහාය ඔහුට ලැබී ඇති අතර, ඔහු ඉතා දරුණු ලෙස විනිසුරුවරයා විවේචනය කර ඇතැයි ද විදෙස් මාධ්ය වැඩිදුරටත් සඳහන් කළේය.
තමාට එරෙහිව අධිකරණය දෙන තීන්දුව කුමක් වුවද, සැබෑ තීන්දුව ප්රකාශයට පත් වන්නේ ලබන නොවැම්බරයේ 5 වැනිදා පැවැත්වෙන ජනාධිපතිවරණයේදී බව ඩොනල්ඩ් ට්රම්ප් ප්රකාශ කර ඇතැයි වාර්තා වේ.
ඔහුගේ නඩු තීන්දුව ලබන ජූලි මස 11 වැනිදා ප්රකාශයට පත් කිරීමට නියමිත බවත්, හිටපු ජනාධිපතිවරයාට නිව්යෝක් අධිකරණයේ විනිසුරු ජුවාන් මර්චන් ලබා දෙන තීන්දුව එක් චෝදනාවකට වසර 4 බැගින් සිරදඬුවමක් හෝ උපරිම වසර 20ක සිරදඬුවමක් හෝ අතිවිශාල වන්දි මුදලක් හෝ විය හැකි බව විදෙස් මාධ්ය වැඩිදුරටත් සඳහන් කළේය.
කෙසේ වෙතත් වන්දි මුදලක් පැනවීමට තීන්දු කෙරෙන්නේ නම් ලබන නොවැම්බර් මාසයේ පැවැත්වෙන අමෙරිකානු ජනාධිපතිවරණයට රිපබ්ලිකන් පක්ෂයේ අපේක්ෂකයා ලෙස ඉදිරිපත් වීමට නියමිත 77 හැවිරිදි ඩොනල්ඩ් ට්රම්ප්ට ඒ සඳහා නඩු තීන්දුව බාධාවක් නොවනු ඇතැයි ද වාර්තා වේ. ඔහුගේ නඩු විභාගය පිළිබඳ ප්රකාශයක් කර ඇති කැලිෆෝනියා විශ්වවිද්යාලයේ නීතිය පිළිබඳ මහාචාර්ය රිචඩ් එල්. හසේන් සඳහන් කර ඇත්තේ අමෙරිකාවේ මැතිවරණ නීතියට අනුව අපරාධ චෝදනා යටතේ වැරැදිකරු වීම ජනාධිපති ධුරයට පත්වීමට බලපෑමක් එල්ල නොවන බව එරට ආණ්ඩුක්රම ව්යවස්ථාවේ සඳහන් වන බවය. ජනාධිපති ධුරය දැරීමට ආණ්ඩුක්රම ව්යස්ථාව මගින් සඳහන් කර ඇත්තේ සීමිත කොන්දේසි කිහිපයක් පමණක් බවත්, අවුරුදු 35ට වැඩි වීම, උත්පත්තියෙන්ම අමෙරිකානු ජාතිකයකු වීම සහ අවම වශයෙන් අවුරුදු 14ක කාලයක් එරට පදිංචිව සිටීම පමණක් බවත් මහාචාර්යවරයා වැඩිදුරටත් ප්රකාශ කර තිබේ. තීන්දුව කුමක් වුවද මීට පෙර ඔහුට එරෙහිව පැවැති සියලු නඩු විභාගවලදී අඛණ්ඩව අභියාචනා ඉදිරිපත් කළ ඩොනල්ඩ් ට්රම්ප් එම තීන්දුවට එරෙහිව අභියාචනාවක් ඉදිරිපත් කරනු ඇතැයි ද විදෙස් මාධ්ය වැඩිදුරටත් වාර්තා කළේය.
Dinamina